Ils abitants da Cuira vegnan adina pli vegls...

... e quai è in svilup che dovra adattaziuns sin differents champs. Impuls e finamiras per quellas adattaziuns dat il «Concept da vegliadetgna 2025».

Laschar ir video ««Concept da vegliadetgna 2025»»

«Concept da vegliadetgna 2025»

1:34 min, Actualitad video dals 16.11.2017

Fin l'onn 2035 datti tenor prognosas actualas 44% dapli abitants sur 65 onns a Cuira. Per dumagnar quest svilup uschè bain sco pussaivel per tuts ha la citad da Cuira elavurà en il «Concept da vegliadetgna 2025» finamiras ed ideas per l'avegnir cun dapli senioras e seniors.

Viver uschè ditg sco pussaivel en las atgnas quatter paraids

La finamira principala è da pussibilitar a glieud veglia da viver uschè ditg sco pussaivel e sur sa sez en l'atgna abitaziun. Uschia duai vegnir tegnids en rom ils custs per la tgira en chasas d'attempads.

Il concept prevesa tranter auter suandantas mesiras:

  • rinforzar e sustegnair la tgira a chasa, cun renconuschientscha, ma er cun agid professiunal
  • anc dapli adattaziuns dal traffic public als basegns da glieud veglia
  • procurar per spazi da viver (abitaziuns) adattadas e pajablas
  • sustegnair purschidas per profilaxa da crudar, moviment e nutriment correct

La gievgia ha il cussegl communal da Cuira prendì enconuschientscha dal concept da la citad. Il cussegl ha numnadamain suenter la pussaivladad da prender influenza sin las mesiras da la citad en las discussiuns da budget.

RR novitads 21:00