Christian Schneller, sia dunna Katja e lur trais uffants pitschens èn sa disads da viver ensemen cun ils lufs.
Ins sa disa vi dals lufs.
Ils lufs vegnan plitost vers saira, cura ch’i vegn stgir. Mintgatant ves’ins els be da dalunsch, mintgatant vegnan els pli datiers e guardan perfin en da la fanestra da stalla.
Pauc tema dal luf, ma adattà il mintgadi
Ma tema n’han il pur e sia dunna betg. Ed ils dus pitschens n’enconuschan anc betg la tema. Els van sulets, ensemen cun lur chaun en il guaud a giugar, sco sch’i na fiss nagut.
Tut auter la pli gronda figlia. La matta da radund 10 onns ha tema e respect dals lufs. Ella aveva inscuntrà in luf dad ir a scola cun il velo. Dapi lura ston ils geniturs purtar la matta cun l’auto a scola, perquai che ella ha tema.
La famiglia Schneller ha stuì adattar tscherts punct da lur mintgadi als lufs. Per exempel guardan els ch’i na laschan betg enturn pavel dals animals; quel pudess numnadamain attrair ils lufs. Er laschan els envidà las glischs da la stalla sur notg per proteger ils animals.
Uschia è la famiglia Schneller da Favugn sa disada plaun a plaun da viver ensemen cun ils lufs.