L'uvestgieu da Cuira sistescha la construcziun dal museum per il stgazi dal dom. El stoppia sclerir sch'il project saja uss anc realisabel, suenter ch'il parlament da la citad da Cuira ha refusà ina contribuziun da 600'000 francs per bajegiar il museum, communitgescha l'uvestgieu.
Nus essan adina stads dal avis ch'il project fiss era en l'interess da la citad. Cunzunt era ord vista dal turissem e da la valita istoric-culturala.
El respectia la decisiun dal parlament. Questa decisiun mettia dentant en dumonda la credibladad dal project, er envers autras persunas ed instituziuns. Senza il sustegn cumplain da la chapitala grischuna stoppia l'uvestgieu sclerir co garantir la finanziaziun.
Citad chapescha ch'il uvestgieu sistescha il project
Il president da la citad da Cuira, Urs Marti, chapescha la situaziun dal uvestgieu. I saja grev da chattar sponsurs ni ulteriurs donaturs sche la citad da Cuira na sustegnia betg il nov bajetg dal nov museum.
Urs Marti insista dentant che la citad da Cuira haja da suatientscha als 10'000 francs vid il mantegniment dal museum. Uschespert ch'il museum saja en funcziun, vegniss la citad era pajar quella contribuziun annuala.
RR novitads 10:00