Siglir tar il cuntegn

Ulteriur Grischun Ils urizis dal prim d'avust laschan fastizs

Il prim d'avust tranter las 17:00 e las 21:00 ha la polizia survegnì pliras annunzias en connex cun ils ferms urizis. Pliras bovas èn idas aval. Ina famiglia ha passentà la notg en in tunnel en la Val S-charl, ulteriuras èn vegnidas salvadas cun il helicopter.

Persunas salvadas cun helicopter

Ina famiglia da trais persunas ha stuì passentar la notg en lur auto en in tunnel, perquai che pliras bovas han sutterrà la via en la Val S-charl. Il Helibernina ha sgulà la gievgia a bun'ura l'um e las duas dunnas a Scuol, nua che la famiglia fa vacanzas. Gia la saira dal prim d'avust aveva la Rega empruvà da sgular. La vista n'era dentant betg bun'avunda, uschia ch'il helicopter ha pudì sgular pir la gievgia.

La vischnanca da Scuol ha communitgà areguard la via en Val S-charl:

  • per peduns e velocipedists ha la via entant puspè pudì vegnir averta,
  • per autos da persunas e bus pitschens resta la via serrada enfin ils 3 d'avust enturn las 08:00,
  • per l'auto da posta resta la via serrada probablamain fin il 4 d'avust a las 08:00.

La Val d'Uina è averta per tut il traffic.

Pass dal Flüela – puspè avert

Er al Pass dal Flüela hai dà ina bova. Persunas na sajan betg vegnidas blessadas, sco quai che la Polizia chantunala ha confermà sin dumonda da RTR. La bova haja però sutterrà l'entira via e saja per consequenza stada serrada fin ils 2 d'avust da mezdi.

Bova en Val Russein

En la Val Russein sur Sumvitg èn 20 persunas stadas serradas en, perquai ch'ina bova ha bloccà la via. Suenter ch'ina maschina gronda ha gì rumì la via, han ellas pudì bandunar la val.

Via en la Val Russein, bova da gronda crappa.
Legenda: Via en la Val Russein. MAD, Polizia chantunala.

Access Livigno serrà

Pervia d'ina bova resta la via a Livignio sur La Drossa serrada ad interim. Livignio è uschia cuntanschibel be via Forcola di Livigno.

Regiun Silvretta

Era quatter persunas ch'eran vi da far ina tura en la regiun da Silvretta èn vegnidas en in urizi. La Rega ha sgulà quellas persunas a Claustra.

Traffic da trens er impedì

Pervi dad inundaziuns è er il traffic da viafier tranter Cuira e Son Gagl stà interrut il prim d'avust ad interim. Tenor Meteo Schweiz na midan ils ferms urizis però nagut vi da la setgira. Per mitigiar la situaziun stoppia quai plover sur in temp pli lung.

RR novitads 06:00+