L'entrada a la festa da Cuira resta gratuita. Tuttina èn ils organisaturs a la tschertga da daners per pudair finanziar cunzunt ils custs da segirtad e da l'infrastructura che sajan creschids d'in cuntin ils ultims onns.
Per betg stuair auzar ils custs per ils stans han ils organisaturs decidì d'introducir il bindel betg obligatoric. Il bindel custa en la prevendita 8 francs ensemen cun in program da festa. Cun la charta da Cuira datti era anc in chip per ina bavronda tiers. Il bindel vegn er vendì durant la festa, lura per 10 francs.
Cun promis da Cuira per la festa da Cuira
Il comité d’organisaziun ha laschà far differents placats cun glieud enconuschenta da Cuira. Quai per render attent als bindels. Uschia tranter auter il president da la citad Urs Marti, il rappunz Gimma, mabain era il lavurant communal Francesco Dantoni u il original da citad Christof Vieli.
-
Bild 1 von 5. Gian-Marco "Gimma" Schmid - Rappunz. Bildquelle: G.-M. Maissen.
-
Bild 2 von 5. Christof Vieli - original da Cuira. Bildquelle: G.-M. Maissen.
-
Bild 3 von 5. Verena Gruber - guida da citad. Bildquelle: G.-M. Maissen.
-
Bild 4 von 5. Urs Marti - president da citad. Bildquelle: G.-M. Maissen.
-
Bild 5 von 5. Francesco Dantoni - lavurant communal. Bildquelle: G.-M. Maissen.
Bavronda sco grazia fitg als pajataglias da Cuira
La bavronda gratuita survegn mo tgi che ha la Chur Card - e quella ha mo tgi che paja taglia a Cuira. Quai na duai tenor il comité d'organisaziun dentant betg esser ina discriminaziun envers la glieud d’utrò, mabain in grazia a quels che pajan cun lur taglias la fin finala er ina gronda part dals custs da la festa.
Tut en tut custa la festa da Cuira numnadamain in mez milliun. Ina gronda part surprenda la citad en furma da lavurs sco per exempel segirtad, nettegiar u parts da l’infrastructura. Che Cuira è pront da surprender quests custs na s'enclegia betg da sai, uschè Andrea Thür dal comitè d'organisaziun.
Finamira dals organisaturs èsi da vender var 7'000 bindels. Quei muntass entradas da 56'000 fin 70'000 francs.
La festa da Curia 2016 ha lieu dals 19 enfin ils 21 d'avust. Il program vegn publitgà sin la pagina d'internet da la festa da Cuira a partir da mez fanadur.
RR actualitad da mezdi 12:00+