In chalender d'advent senza portas ma plain surpraisas...

Quai è il chalender d'advent teatral en il Museum retic a Cuira. In'attracziun speziala ch'exista gia dapi 15 onns. Per festivar il giubileum han ils organisaturs envidà ad ina surpraisa supplementara, gia avant che l'advent cumenza.

Laschar ir video «In chalender d'advent tut spezial...»

In chalender d'advent tut spezial...

1:31 min, Actualitad video dals 24.11.2017

Var 1'700 persunas han mintgamai visità il chalender d'advent teatral ils ultims 15 onns. Per la presidenta Isabel Christen èsi cler pertge ch'ils uffants vegnan era anc ozendi en il temp digital cun computers, smartphones e tablets a guardar in teater: I saja la ruassaivladad e l'energia dal mument cura che la glisch vegnia stizzada ed insatge tut surprendent capitia sin tribuna.

Sursiglir cuntegn supplementar

Chalender d'advent teatral

chasa cun fanestras en furma da ramas da mlaetgs, mintgamai cun ina chandaila

mad

Mintga saira d'advent datti ina surpraisa da teater per uffants a partir da 5 onns. L'entrada è gratuita.

Dapi 15 onns èn las preschentaziuns sin plaun sut il tetg dal Museum Retic, mintgamai dals 1 fin ils 23 da december a las 17:15 uras.

Apero e surpraisa supplementara sin il 15avel

Sco surpraisa d'advent han ils organisaturs envidà la mesemna passada ad in apero. Acturs ed acturas, uffants, geniturs e represchentants da las medias han laschà gustar in apero. Suenter intgins pleds da festa hai lura dà la preschentaziun da teater usitada.

La gruppa «Fabulaturas» ha divertì giuven e vegl cun ina paraula improvisada. Unicorns, in guaud striunà ed ina diala han procurà per tensiun sin tribuna. Il public ha laschà plaschair la 323avla preschentaziun dal chalender d'advent teatral.

Eveniment spezial era per acturs

Tenor ils acturs da la gruppa «Fabulaturas» porscha il chalender d'advent teatral era per els insatge ch'els n'han betg sin autras tribunas. I saja cunzunt l'atmosfera famigliara, ch'ins saja da strusch in da l'auter ed er il factur da surpraisa che ni acturs ni public san tge che spetgia els.

Il coc dal chalender è dapi 15 onns il medem

I na saja betg sa midà bler, uschia Isabel Christen. Acturas ed acturs che veglian sa participar chattian els mintg'onn avunda grazia a buns contacts. Sulet il rimnar daners saja vegnì in zic pli stentus cun ils onns. Ma ella è optimistica dad avair er en l'avegnir il sustegn da fundaziuns, citad e donaturs.

Quai che pertutga cuntanscher la glieud è però er il chalender d'advent i cun il temp e s'adattà al mund digital. Da nov datti ina pagina d'internet, sco er in profil sin Facebook. Er nova è la concurrenza da malegiar ch'i dat a partir da quest onn.

RR actualitad 11:00