Ils blers Grischuns al enconuschan – il «Socka Hitsch» che ha dapi radund 20 onns ses stan da fiera sper la via principala en direcziun da Tavau gist avant Landquart.
La fin da l’onn sto el dentant rumir ses plaz. La Viafier retica engrondescha ses binari e dovra il plaz dal «Socka Hitsch» che porta il num burgais Christian Zwicky. Trist, ch'el sto chalar n'è l’um da bunamain 80 onns però betg. El sa legra da pudair far inqual viadi en l’Europa. Venezia e Paris stattan sin il program.
007 ha cumprà soccas cun muster da capricorns
Durant ils ultims 20 onns che Christian Zwicky ha vendì en ses stan ha el gì bain inqual client da num e pum. Sper divers politichers chantunals ha era Ruth Dreifuss visità el a ses stan.
Internaziunal èsi sta ils frars Vogel, politichers da la Germania e nagin auter che 007 en persuna: Roger Moore. Lez ha dal reminent cumprà soccas cun muster da capricorns.
RR actualitad 08:20