Il venderdi saira suenter las 22:00 è in'automobilista vegnida a Claustra tar ina cruschada el vitg cun ses auto giud via. L'auto è lura collidà cun in idrant e cun in distributur da forza electrica. L'automobilista ch'è sa blessada tar l'accident è vegnida transportada a l'ospital da Schiers. Tar ella è vegnì ordinà ina emprova da sang.
Sco la Polizia chantunala scriva saja sortì da l'idrant donnegià ina gronda massa d'aua sin la via. Pervi da la collisiun cun il distributur da forza electrica ha il provediment da la forza stuì vegnir interrut per duas uras en in part da Claustra. En acziun pervi da quest accident èn stads ils pumpiers, specialists da la Repower sco er il survegliader dal provediment d'aua.