Durant varga in’ura han il president communal da Saas, Stefan Darnuzer, il president communal da Claustra-Serneus, Kurt Steck e la cusseglier guvernativa, Barbara Janom Steiner preschentà lur arguments, daco ch’ils vischins da Saas e Claustra duain dir gea a l’incorporaziun da Saas ils 14 da zercladur. Ed ils arguments davart ils problems finanzials da Saas en l’avegnir, la mancanza da persunas per uffizis politics u era il rinforzament da la nova vischnanca cun la fracziun Saas e ses territori da skis Madrisa paran d’avair gì effect. Ils votums dals preschents èn tuts stads positivs – danor in sulet.
«Jau vegn a votar na»
L’um pli attempà da Saas sa disturba betg mo che la vischnanca n’ha betg infurmà bain avunda a l’ultima votaziun consultativa, mabain che la vischnanca da Saas duai simplamain vegnir incorporada en quella da Claustra-Serneus – quai che muntia che Saas surpiglia simplamain tut quai da Claustra e dettia er tut il possess a Claustra. Ad ina fusiun da las vischnancas, avess el ditg gea, ad ina incorporaziun vegnia el dentant a dir na.
4,8 milliuns francs dal chantun
Il chantun Grischun è pront da sustegnair l’entira incorporaziun da Saas cun 4,8 milliuns francs. Quai suenter ch’il chantun haja analisà tants ils avantatgs e dischavantatgs per las duas vischnancas Saas e Claustra-Serneus, sco era per las autras vischnancas vischinantas, di la cussegliera guvernativa Barbara Janom Steiner. «Nus essan lura vegnids a la conclusiun che quella incorporaziun per Saas schlias ina pluna problems, cunzunt finanzials. E per Claustra fiss quai nagin problem.»
L’incorporaziun da Saas schlias blers problems ed i dess er moviment en questa vallada.
Vischnancas decidan e betg regenza
Ultra da quai purtass l’incorporaziun era moviment en la vallada è Barbara Janom Steiner da l’avis. Pertge els vesian ch’era las vischnancas en il Partenz cumbattian cun tscherts problems: «I mancan las resursas finanzialas sco era las persunalas», di la cussegliera guvernativa.
Dentant la fin finala saja la decisiun da fusiunar u d’incorporar anc adina ina decisiun da la populaziun e betg ina decisiun che la regenza u il Cussegl grond dicteschia da surengiu. Sco quai ch’i paria, creschia dentant plaun plaunet la chapientscha en la populaziun ch’i fa da basegn dad ir novas vias ed ina da quellas saja la fusiun, respectiv l’incorporaziun
