Cun ina pitschna festa d'avertura è il vial nord ussa surdà uffizialmain al traffic. En divers pleds è vegnì engrazià als responsabels da planisaziun e construcziun dal project da 100 milliuns francs. Tranter ils represchentants da la Confederaziun èn stads Jürg Röthlisberger, il directur da l'Uffizi federal da vias ASTRA, il vicepresident sco era divers schefs da posts responsabels per la planisaziun dal project.
Il chantun Grischun è stà represchentà cun il cusseglier guvernativ Mario Cavigelli ed ils represchentants da l'Uffizi da construcziun bassa, l'Uffizi per guaud e privels da natira sco era da l'Uffizi d'ambient. Ed er divers funcziunaris da la vischnanca da Trimmis èn stads envidads ed han purtà lur engraziament.
«Halbmil», la punt da muntada naziunala per la selvaschina
En connex cun las lavurs da construcziun ha l'Uffizi federal da vias er reconstruì la punt da selvaschina «Halbmil», in corridor da selvaschina da muntada naziunala. Quel era interrut entras la via naziunala A13 ed ils binaris da viafier da la SBB e la Viafier retica.
Ussa è il corridor avert e la selvaschina po passar senza impediments. La punt da «Halbmil» ha custà 10 milliuns.
Animals anc betg intgantads da lur punt nova
Dapi il december passà pudessan ils animals duvrar la punt. Enfin uss n'èn ils animals dentant anc betg uschè intgantads. Sulet vulps, taiss e fiergnas han duvrà ella, uschia il guardiaselvaschina da Trimmis René Gadient. Enfin ch'ils animals pli grond sco tschiervs e chavriels dovran ella possia quai anc ir in mument.
Insumma na saja la punt anc betg finida. I vegn anc plantà plantas e chaglias per ch'ils animals survegnan dapli gust da duvrar ella.
-
Bild 1 von 5. Il nov vial nord ha uss er ina strivla da panna. Bildquelle: RTR, Hugo Schär.
-
Bild 2 von 5. Ina part d'ina veglia platta da betun dal vial nord ha servì sco pult da pledar. Bildquelle: RTR, Hugo Schär.
-
Bild 3 von 5. Jürg Röthlisberger, il directur dal ASTRA, ha er tegnì ses pled sin la platta da betun. Bildquelle: RTR, Hugo Schär.
-
Bild 4 von 5. Las plattas da betun da l'anteriur vial nord èn davent, uss èsi da rentiralisar la via. Bildquelle: RTR, Hugo Schär.
-
Bild 5 von 5. L'anteriur vial nord a Trimmis vegn disfatg. Bildquelle: RTR, Hugo Schär.
Via libra sin l'autostrada
Per ils automobilists è l'autostrada averta gia intgins dis. Els na vegnan betg pli tangads da las ultimas lavurs che vegnan anc fatgas. L'anteriur vial nord vegn ussa disfatg cumplettamain. Questas lavurs n'èn anc betg terminadas.
Dapli tar il project
La construziun dal nov vial ha durà pli pauc temp che quintà. Las diversas lavurs da recultivar, da far novas sendas ed era da renatiralisar l'anteriur vial nord duran anc fin la fin dal 2018, uschia ha communitgà l'ASTRA.
RR actualitad 11:00