Uss, dus onns suenter l’emprima badigliada èn las lavurs vi dal nov cumplex da scola amez la vischnanca da Claustra terminadas.
Uss èn tuttas e tuts al medem lieu
Il nov cumplex da scola cumpiglia la scoletta, la scola primara e la scola superiura. «Il pli grond avantatg è che tut las classas van uss al medem lieu a scola», declera il mainascola Gion Caviezel.
Per las scolaras ed ils scolars da Claustra-Serneus datti tut en tut bunamain 200 differentas stanzas: sper stanzas da scola per exempel er stanzas per zambregiar e cuschinar, in labor u in’aula. Er dador il stabiliment datti in'infrastructura nova – ina plazza da gieu sco era pliras plazzas da sport endadens e dadora.
Era l’infrastructura en las stanzas da scolas è nova. Per exempel: La veglias tablas da crida èn vegnidas remplazzadas cun visurs digitals ed interactivs. Uschia èsi pussaivel da projectar paginas d’internet via smartphone sin il grond visur. Vinavant è era ina marella digitala vegnida integrada che sa engrondir fitg pitschens objects u texts.
Ina lunga via
La davosa renovaziun pli gronda è stada il 1996. Dapi lura èsi stà ina lunga via tar la scola. Claustra-Serneus n’è ditg betg vegnì perina per chattar in nov lieu per la scola che duai unir tut las classas. Sco Gion Caviezel declera, haja quai durà 30 onns:
Ussa èsi gartegià a nus da chattar in spazi che tuts han vulì.
Ils 13 da december 2015 è il project vegnì a l’urna. Cun 80% da las vuschs ha il pievel da Claustra-Serneus approvà il nov cumplex da scola.
RR novitads 17:00