Siglir tar il cuntegn

Header

Navigaziun

Legenda: Guardar il video Fieu mess probablamain intenziunadamain . Durada 01:09 minutas.
Or da Actualitad video dals 13.01.2019.
cuntegn

Ulteriur Grischun Incendi intenziunà a Cuira: Trais persunas moran

  • La notg sin dumengia hai brischà a Cuira en ina chasa da pliras famiglias.
  • Tenor emprimas enconuschientschas saja il fieu vegnì mess aposta.
  • Ils pumpiers han chattà in um e ses dus uffants morts.
  • Otg persunas han stuì ir a l'ospital pervi d'ina tissientada da fim.
  • 48 persunas ord 38 abitaziuns èn vegnidas evacuadas.

La Polizia chantunala haja retschavì a las 03:05 l'alarm ch'i brischia en ina abitaziun d'ina chasada da pliras famiglias cun sis auzadas. Ils pumpiers hajan cumenzà a stizzar il fieu ed evacuà 48 persunas ord 38 abitaziuns. Durant las lavurs da stizzar hajan ils pumpiers chattà trais baras en l'abitaziun, nua ch'i brischava.

In um e dus uffants morts

Tar las baras sa tractia dad in um creschì da 33 ons da la Republica Dominicana e ses dus uffants – in mat da 3 onns ed ina matta dad 8 onns. L'identificaziun formala na saja anc betg vegnida fatga. En il center da las investigaziuns stat la tesa, ch’il bab avess pudì avair dà fieu intenziunadamain. Igl haja dà almain in’explosiun tras accelerader da fieu – scriva la polizia vinavant. Davart ils motivs vegni ussa investigà.

Tar sis abitants e dus pumpiers datti il suspect dad ina tissientada da fim. Quellas persunas èn vegnidas transportadas a l'ospital chantunal.

Acziun da salvament gronda

Il Care Team Grischun ha tgirà ils evacuads. Quels han chattà en ina localitad datiers da la chasa in suttetg. Ina part dals evacuads ha la bun'ura puspè pudì returnar en ses dachasa. Per ils ulteriurs abitants da la chasa vegn anc sclerì, schebain els pon returnar en lur dachasa u betg. Tenor la polizia dependia, schebain las abitaziuns da quellas persunas sajan suenter il brischament anc abitablas u betg.

Ils pumpiers da Cuira èn stads en acziun cun 70 persunas. Las lavurs da stizzar han pudì vegnir terminadas la bun'ura. Ambulanzas dals ospitals da Tusaun, Schiers e da Cuira èn stads en acziun. Ensemen cun la procura publica examinescha la la Polizia chantunala la causa da l'incendi.

RR novitads 06:00+