Er il segund grond brischament d’hotel en il Grischun dals ultims 100 onns resta in misteri. La procura publica terminescha las inquisiziuns en connex cun il brischament dal Posthotel ad Arosa. Quai perquai ch’ins na possia betg sclerir la causa da l’incendi, ha confermà la procura publica envers l'Agentura da novitads svizra. Las inquisiziuns han cuzzà passa 2 onns.
36 uras ha il fieu brischà
Il fieu era rut or ils 30 da december 2016 en in dals plauns sutterrans. Radund 150 persunas han stuì vegnir evacuadas damai che l'hotel era occupà bain durant la stagiun auta. Ina persuna aveva survegnì ina greva tissientada da fim, duas eran sa blessadas mez grev. Il fieu è vegnì stizzà pir suenter radund 36 uras.
Segund grond incendi
L'incendi ha laschà enavos l'hotel destruì cumplettamain. Tar il segund grond incendi da l'assicuranza d'edifizi grischuna hai dà donns da 15 milliuns francs. Be ina giada ha l'assicuranza pajà ina summa anc pli auta. Quai è stà il 1989 tar l'incendi da l'hotel Waldhaus a Tarasp en Engiadina Bassa cura ch'ils donns han muntà ad ina summa da 23 milliuns francs. Er là n'han ins mai pudì sclerir la raschun per l'incendi. Ins aveva supponì ch'insatgi haja dà fieu intenziunadamain.
RR novitads 16:00
