Siglir tar il cuntegn
cuntegn

Ulteriur Grischun Inoltrà iniziativa per mantegnair ils kinos en citad Cuira

Il comité d'iniziativa sut la direcziun da Markus Kalberer ha inoltrà l'iniziativa «per ina citad veglia viva – iniziativa per mantegnair ils kinos da citad a Cuira». Cun l'iniziativa duai vegnir bloccà il project per in kino grond dasper il City West a Cuira.

Purtret da l'entrada dal kino center a Cuira.
Legenda: Ils dus kinos en citad duain vegnir spendrads grazia a l'iniziativa che bloccass il cumplex da kino grond a l'ur da la citad. RTR, Lea Livers

Sco quai che la chanzlia da la citad scriva han ils iniziants inoltrà ad uras las suttascripziuns per l'iniziativa. Tenor lescha dovran ins 800 vuschs per in'iniziativa valaivla. Inoltrà ha il comité 816 suttascripziuns. La chanzlia da la citad examinescha sco proxim sche almain 800 da las vuschs rimnadas èn valaivlas. Plinavant vegn controllà ch'il text per l'iniziativa na cuntrafetschia betg ad autras regulaziuns. Il cussegl da citad decida lura sche l'iniziativa è valaivla u betg.

La lescha da construcziun a Cuira vegniss midada sco suonda:

  • La zona da lavur A1 è definida per manaschis da mastergn, commerzi e fatschentas da servetschs (Dienstleistungsbetriebe) cun excepziun da kinos.
  • La nova versiun da la lescha (qua sura) vala era per tuttas dumondas da construcziun che n'èn anc betg lubidas definitivamain cura che l'iniziativa è vegnida approvada.

RR novitads 14:00