«Instruments da controlla betg avant maun u na funcziunan betg»

Per l’expert fiduziari e revisur federal, Martin Cavegn èsi cler: In tal cas da fraud sco tar Allemann e Zinsli po be capitar sch’ils instruments da controlla na funcziunan betg u n’èn betg avant maun.

L'anteriur president dal cussegl d'administraziun dal fiduziari Allemann e Zinsli vegn suspectà d'avair cugliunà clients per pliras milliuns francs. Bild in Lightbox öffnen.

Legenda da maletgs: L'anteriur president dal cussegl d'administraziun dal fiduziari Allemann e Zinsli vegn suspectà d'avair cugliunà clie... Keystone

En ina societad acziunaria elegian ils acziunaris il cussegl d’administraziun che po consister or dad ina u pliras persunas. Quellas han lura l’incumbensa d’organisar il manaschi e d’introducir instruments da controlla. Er tar lur incumbensas tutga da mirar che quels instruments funcziuneschian.

«E sch’i na vegn betg introducì da quels instruments da controlla ed il cussegl d’administraziun ha cumplainamain fidanza tar in commember dal cussegl d’administraziun u tar il manader da fatschenta, e na controllescha mai suenter, lura è quai pussibel», concluda Martin Cavegn.

In dals gronds cas en Svizra

Il cas da fraud ch'è vegnì a la glisch tar il biro fiduziari Allemann e Zinsli è per relaziuns svizras in dals gronds cas da criminalitad economica. Pertutgads dal fraud èn sco quai ch’i para plirs clients. Tar la «Chasa da parcar Cuira SA» è il donn vegnì inditgà cun 3 milliuns francs.