La proposta per spustar l’elecziun dal president è vegnida da Cristian Collenberg, il president da la Societad Retorumantscha (SRR). Ina spustaziun da l’elecziun avess dà la pussaivladad da tschertgar ulteriurs candidats per il presidi. Tenor el avessi duvrà in candidat u ina candidata che n’è betg gia dal cumenzament in candidat transitoric, mabain ina persuna che stat pli ditg a la testa da la LR ed dat pli lungas perspectivas a la LR.
L’agir da la suprastanza n’ha betg cuntentà
Critica hai dà in pau da tuttas varts pervi da l’agir da la suprastanza. Che quella ha tegnì tschelà la demissiun da Duri Bezzola fin avant dus mais e gist preschentà in candidat. Sco ch'il president actual Duri Bezzola ha ditg, è la suprastanza persvasa che quai saja stà la dretga via. Critica avessi dà uschè u uschia, manegia el: «pertge sche nus fissan vegnids senza proposta, avessan tschertas varts pudì dir cun raschun, ma na faschais vus betg la lavur da preparar il terrain?» La discussiun davart il spustament ha cuzzà var in’ura. La finala è la proposta vegnida refusada en ina votaziun cun scrutini cun 43 encunter 16 vuschs. Cristian Collenberg po acceptar questa decisiun democratica. El spera dentant che la proxima giada giajan las uniuns regiunalas sezzas a la tschertga da candidats e fetschian las propostas.
Bleras finamiras
Sinaquai è Johannes Flury vegnì elegì da 51 delegads cun 8 abstenziuns. El daventa uschia il successur da Duri Bezzola ch’è stà trais onns president da la Lia Rumantscha. Per ils proxims trais onns ha el avunda lavur: per l’ina la structura da la Lia Rumantscha, ils meds d’instrucziun ed il plan d’instrucziun 21, sco era la purschida per la diaspora.
Da nov en suprastanza è Donat Nay da la Surselva Rumantscha. El succeda a Rino Darms. Gion Capeder, Jon Carl Tall e Maria Sedláček èn vegnids reelegids en suprastanza.