Erica Thom lavura dapi 13 onns tar il Kino center ed Apollo a Cuira. Il kino è sco in segund dachasa, di la dunna da Ramosch en l’Engiadina. Ma dapi il lockdown è sia lavur sa midada.
Avant lavurava Erica Thom sco vendidra tar il kiosc – uss è ella tecnicista, vendidra da bigliets e quella ch'accumpogna ils visitaders tar lur sez, en ina.
Jau fatsch uss la lavur che quatter persunas faschevan avant.
La raschun giascha sin il maun. Schon avant corona sajan las cifras da visitadras e visitaders idas enavos – uss anc bler pli fitg. Uschia ha il film «Balloon» 12 visitadras ed il film d’action «Tenet» che ha entschet in’ura pli tard en la sala gronda, nov aspectaturas ed aspectaturs.
Contact cun la glieud
Erica Thom giauda las novas lavurs. Uschia saja mai lungurus ed ins haja avunda da far. Tge che plascha il meglier ad ella è il contact cun las persunas. Per l’Engiadinaisa èsi il pli bel da savair dar ina baterlada ed ella senta che oravant tut las persunas pli veglias sajan ledas d’avair insatgi da tschantschar – er sch'i saja mo sur da l’aura.