Dapi mesemna da mezdi ha il Kinocenter a Cuira puspè avert sias portas, quai cun preschentaziuns dal suentermezdi per uffants e famiglias. Tenor Kino Cuira valian dentant numerusas restricziuns pervi da corona, tranter auter in obligatori da purtar mascras per persunas davent da 12 onns ed in dumber limità da plazzas da seser. Sper quai na dastgan ils giasts er betg consumar insatge en la sala. Malgrà restricziuns ha bain inqual fan da film chattà la via en il kino.
Jau m'allegr meeega, perquai ch'jeu sun gia uschè daditg betg pli stà a kino.
Er Rita Kalberer che maina ils dus kinos a Cuira è leda da puspè pudair avrir las portas dal Kinocenter. Tuttina saja uss in zic la dumonda tge films novs che vegnan insumma, cunzunt er perquai che la Germania, ch'è in impurtant partenari per ils kinos en Svizra, ha anc serrà ils kinos. In u l'auter blockbuster saja dentant annunzià uschia che Rita Kalberer guarda positiv en il futur.
Jau sun persvasa ch'il kino viva vinavant. Il kino ha fatg atras gia bler pli grevas crisas.
In'emprova
Da puspè avrir il Kinocenter saja in'emprova. Kino Cuira dubitescha ch'ins vegn da lavurar uschia ch'ins possia cuvrir ils custs. Perquai resta il kino Apollo era serrà ad interim.