Siglir tar il cuntegn

Header

Navigaziun

Legenda: Tadlar il audio Bunura: Teater sco critica da digitalisaziun: Kulturrevolution. Durada 02:56 minutas.
02:56 min, Actualitad dals 05.01.2019.
cuntegn

Ulteriur Grischun «Kulturrevolution» – Teater cunter la digitalisaziun totala

Tge capitass, sche maschinas surprendessan d'in di a l'auter nossa lavur? Per tge chaussa fiss l'uman anc qua? Co giessi vinavant cun el? Exact sin quai aspect mira il toc da teater «Kulturrevolution» dal reschissur grischun Georg Scharegg che vegn proximamain preschentà en il teater da Cuira.

«Kulturrevolution» è il toc da teater dal reschissur grischun Georg Scharegg. Il cuntegn dal toc è fitg actual: la digitalisaziun.

Nagina lavur munta libertad infinita

Cunquai che l'intelligenza artifiziala ed ils roboters vegnan adina pli perderts, poi bain esser ch'ina ni l’autra lavur vegn remplazzada tras ina maschina. Georg Scharegg va dentant pli lunsch: Tge schabegiass, sche mintga plazza da lavur vegniss remplazzada cun ina maschina? Quella dumonda è in dals puncts centrals dal toc. Fatg fiss ch’il carstgaun avess ina libertad infinita. Il toc mussa en differents scenaris, sch’il carstgaun fiss tras quai pli cuntent ni betg, e co la societad pudess midar.

Ils gigants da la tecnica

Ina part dal toc da teater cumpiglia era ina vista critica envers ils gigants da la tecnica, sco per exempel Twitter, Amazon ni Google. Sco rimnaders da datas vegn la pussanza da las interpresas crititgada. Era fenomens d’ozendi sco «Shitstorms» e «Fake News» survegnan en il toc ina muntada speziala.

«Kulturrevolution»

Actualmain è la truppa da nov acturs ed acturas en las davosas preparaziuns. La premiera dal toc da teater da Georg Scharegg ha lieu ils 9 da schaner, a las 20:00, en il teater da Cuira.

RR actualitad 07:00