Gia la sisavla giada vegn brischà giu la plaunca da mira dal plaz da sajettar Rheinsand a Cuira. La situaziun al Calanda procura per ina ristga da fieu tut atgna a la plaunca. Ella è exponida al sid, i dat là favugn, la pendenza da la plaunca e ch'i vegn sajettà sin la plaunca procuran per la situaziun che sto vegnir reglada da pumpiers.
Grazia a las nursas che pasculeschan la stad durant las pausas sin la plaunca, sa reducescha la ristga per brischaments fitg. Durant l'enviern lura, ston ins mo pli brischar zonas singulas nua che blera massa è stada enavos. Quai è era quest onn il cas.
Il proceder è ponderà bain
Il helicopter dal tip Super-Puma sgola sur la plaunca ora per bagnar ils cunfins da la zona che duessan arder. Uschia na po il fieu betg sa reparter nua ch'i na po betg esser. Per pudair bagnar sto il helicopter sgular en tut 20 giadas giu tar il Rain per aua e puspè tar il Calanda per bagnar. Lura pon ils lavurers dar fieu la plaunca da sisum vers engiu. Là arda il fieu lura enfin ch'el na chatta nagin nutriment pli, pia enfin tar il cunfin ch'il helicopter ha bagnà.
Augmenta la segirezza, mantegnì varietad da las spezias
Avant 30 onns hai dà in grond incendi pervi d'exercezis da sajettar en Grischun. Ord quai motiv èsi vegnì prendì mesiras cun brischar il pastg restant a moda controllada. Ils brischaments controllads èn vegnids lubids dal departament federal per defensiun per sis onns davent dal 2003/2004 ed il 2011/2012 per ulteriurs tschintg onns. Tras la pasculaziun da quests territoris ha pudì vegnir cuntanschì ina sminuziun dal dumber d'incendis spontans. Las
Las controllas mussan che la varietad da las spezias d'animals e da plantas è s'augmentada sin il terren brischà. Uschia è la valita ecologica da quests pràs s'augmentada cumpareglià cun l'onn 2004.
RR actualitad 17:00