L'aura ha spendrà las cursas da chavals a Maiavilla

Cun la terza emprova èsi tuttina anc gartegià. En ina versiun redimensiunada hai dà en total otg cursas: Duas cursas al trot, duas cursas senza impediments e quatter cursas cun impediments. Eveniment principal è stà la cursa da cross sur 5,4 km, il «Grond Premi da Maiavilla».

Laschar ir video «Cursas da chavals «light» a Maiavilla»

Cursas da chavals «light» a Maiavilla

2:20 min, Telesguard dals 16.10.2017

La suprastanza da l'uniun da cursas Maiavilla / Bogn Ragaz ha decidì avant in'emna da far en total otg cursas. Uschia hai tuttina anc dà ina 61avla ediziun da las cursas tradiziunalas suenter che omadus dis eran vegnids annulads.

Victur dal premi principal, la cursa da cross sur 5,4 km cun in premi en la valur da 25'000 francs è il chavaltgader Rapahel Lingg cun il chaval Egisto.

Bun'atmosfera malgrà pli pauc glamour

Sursiglir cuntegn supplementar

Ediziun 2017 en cifras

  • 55 chavals
  • 40 chavaltgaders
  • 5'500 aspectaturs
  • 67'936 francs svieuta da scumessas
  • passa 100 gidanters
  • premis en la valur da 101'000 francs

La tribuna e la tenda da festa èn vegnidas remplazzadas cun in manaschi d'ustaria redimensiunà: L'offerta è survesaivla ed ils pretschs moderats. In ambient che regorda a temps passads.

A la bun'atmosfera n'ha quai però betg fatg donn. La bell'aura ha attratg da blera glieud che ha er gi pazienza sch'i era da star en colonna in quart'ura avant il stan da liongias u en tenda da scumessas.

President cuntent

Ruedi Niederer, il president dal comité d'organisaziun è cuntent cun quai ch'è anc stà pussaivel da realisar suenter las desditgas dals termins uffizials. Cunzunt il grond dumber d'aspectaturs enturn mezdi ed er blers resuns positivs ha fatg surstar el positivamain. El saja segirs dad avair prendì las dretgas decisiuns per questa situaziun extraordinaria e guardia optimistic en l'avegnir.

Per decider definitivamain davart l'avegnir da las cursas da chavals a Maiavilla dovri però anc ina analisa detagliada, uschia scrivan ils organisaturs en ina communicaziun a las medias. Quai gist er suenter tut la lavur da reorganisaziun entaifer ils ultims dis e la situaziun extraordinaria da questa ediziun.

RR novitads 17:00