Siglir tar il cuntegn
Inhalt

Ulteriur Grischun L'ospital da Tavau ha in nov directur

Davent dal 1. da november surpiglia Daniel Patsch la direcziun da l’Ospital Tavau SA. Dapi il mars passà manava Marco Oesch ad interim l’ospital.

Daniel Patsch.
Legenda: Daniel Patsch maina en il futur l'ospital da Tavau. MAD

La fin favrer aveva il directur Hanspeter Wyss bandunà l’ospital da Tavau. Il cussegl d’administraziun aveva numnadamain decidì da vulair midar strategia suenter onns cun gronds deficits. I duai dar ina cooperaziun cun l'Ospital chantunal a Cuira.

In grond satgados

Daniel Patsch ha 44 onns, deriva da l'Austria ed abitescha dapi quatter onns en Svizra, sco l'Ospital Tavau SA communitgescha. El ha studegià economia, e lavura dapi il 2004 en la branscha da sanadad. Tranter auter ha el accumpagnà il svilup da pliras clinicas da reabilitaziun en l’Austria, e manà ina gruppa da clinicas en Svizra. Davent dal december 2017 ha el lavurà sco cussegliader.

Marco Oesch surpiglia puspè sia funcziun oriunda tar l'Ospital chantunal a Cuira, sco manader dal departament dals servetschs. El vegnia vinavant a cussegliar l'ospital da Tavau, sco l'Ospital Tavau SA scriva.

RR novitads 12:00