Siglir tar il cuntegn
Inhalt

Ulteriur Grischun La curt roiala da Zezras vegn averta al public

Sonda, ils 24 d'october po la publicitad ir a guardar il parc archeologic enturn la curt roiala da Zezras. In element principal da la visualisaziun archelogica è il plan reconstruì da l'edifizi central. Il president da la regenza Martin Jäger vegn uschai a terminar il project cuminaivel.

Ina plazza ord la vista d'utschi.
Legenda: La curt roiala è vegnida restaurada communabel cun la confederaziun, il chatun, e la vischnanca da Zezras. rg servetsch argeologic dal Grischun

Vastas exchavaziuns da salvament dal servetsch archeologic dal Grischun han pudì identifitgar il monument sco curt roiala carolingic-ottonica, communitgescha la regenza grischuna.

Rescuverta d'ina curt roiala

Emprimas ruinas ed emprims mirs èn vegnids scuvrids per cas gia l'onn 2003 a chaschun da lavurs da construcziun ed han alura pudì vegnir identifitgads sco curt roiala dad Otto I. (912 - 973). Uschia è la curt roiala carolingic-ottonica da Zezras in monument archeologic extraordinari per il chantun Grischun, ma er per tut la Svizra. Fin ussa n'hai betg dà insatge cumparegliabel en Svizra, tant ch'il monument è, dal tuttafatg cun raschun, d'ina impurtanza naziunala.

Salvament a forzas unidas

Il grond engaschament da la confederaziun, dal chantun e da la vischnanca han permess, cun contribuziuns considerablas, d'acquistar il territori da construcziun pertutgà e da conservar il stabiliment en la terra. En stretga collavuraziun cun la vischnanca da Zezras è vegnì elavurà a partir da l'onn 2012 in concept d'intermediaziun e da furmaziun.

Parc archeologic a Zezras

In element central da la visualisaziun archeologica è il plan reconstruì da l'edifizi central. Quest plan è vegnì marcà per terra cun strivlas da metal e l'impressiun dal spazi vegn dada tras in'emplantaziun verda. Simpels corpus per seser envidan la populaziun indigena sco er ils giasts da far ina pausa. Ils fatgs istorics sco er ils resultats ils pli impurtants da las exchavaziuns figureschan sin trais grondas tavlas d'infurmaziun ed animeschan las visitadras ed ils visitaders da far in tur. Cun in'avertura festiva dal parc archeologic terminescha il president da la regenza Martin Jäger in project cuminaivel da la confederaziun, dal chantun e da la vischnanca.

RR novitads 12:00