La HIA ha quest onn lieu per l'emprima giada il mars e dura nov dis. Dals 17 fin ils 25 da mars preschentan puspè 200 expositurs lur products. Sco mintg'onn datti er quest onn quatter exposiziuns spezialas.
- Il chaun – mes meglier ami: Il chaun tutga tar ils pli vegls cumpogns da l'uman. Almain dapi 15'000 onns vivan ils chauns cun nus carstgauns. Che chauns han abilitads extraordinarias che gidan per exempel da salvar la vita a persunas, mussa l'exposiziun speziala. Preschentaziuns sin la tribuna da la HIGA mussan tge spectrum da talents ch'ils amis cun quatter chommas han.
- 100 onns battasendas: Ils battasendas dal Grischun pon festivar quest onn il giubileum da 100 onns. Sper in center d'infurmaziun, envidan differentas purschidas ad uffants e giuvenils d'emprender ad enconuscher ils battasendas. Sper las tecnicas dals battasendas sco per exempel construir tendas ed orientaziun, datti er la pussaivladad da far paun sur il fieu e tschertgar stgazis.
- Co far in agen board? Tut quels che vulevan gia daditg far sez in surfboard, skateboard, snowboard, u skis, quels chattan tips e materials per construir l'agen board en l'exposiziun speziala «Enlain». Ils dus board shapers Urs e Ben mussan lur mastergn e dattan als visitaders er gist la pussaivladad da pruvar ora material e guaffens.
- Chapir l'institut d'assicuranza sociala: Ils servetschs da l'Institut d'assicuranza sociala dal chantun Grischun SVA enconuschan ils blers mo pauc. A moda infurmativa, ma er termaglianta preschenta l'exposiziun speziala il tema assicuranza sociala. Ultra da quai èn previs discurs da podium cun experts.
Oz è el decorà cun flurs – l’emprima giada era l’Obertor il motiv
Sper ils products ed expositurs èn era ils placats in element preschent da la HIGA. I ha dà colurads, simpels u er tals dad artists enconuschents. Ils placats da la HIGA han sco l’exposiziun sezza er fatg in svilup sur ils decennis. Il pli emprim mussa l'enconuschent «Obertor» da Cuira. L’actual è ornà cun fluras. En il video datti ina schelta da placats che han carmalà dapi il 1957 visitaders e visitadras sin l’areal da la Stadthalle a Cuira a l'exposiziun da la HIGA.
Legenda:
Il placat actual da la HIGA.
MAD