En il nov center a Vaz Sut duessan en futur vegnir ramassads, sortids e distribuids ils pachets dal Grischun. Uschia spargna La Posta il viadi fin al center a Frauenfeld ed ils pachets arrivan pli spert al lieu. La Posta vul cun quest center meglierar il service per ils clients. Fatg quint vegn ch'il center saja pront il settember 2020.
La radunanza communala da Vaz Sut ha gia il december 2017 ditg Gea al project da La Posta. En il nov center duessi esser pussaivel da sortir bunamain 8'000 pachets per ura. El remplazza ils centers existents a Landquart e Buchs (SG). Ils 115 collavuraturs da quels dus centers lavuran en futur a Vaz Sut. Ils custs da construcziun dal center muntan tenor communicaziun a bunamain 50 milliuns francs – quels surpiglia la posta sezza.
Il center a Vaz Sut è in dals trais novs centers da pachets regiunals. Ils dus auters vegnan construids a Vétroz (Vallais) ed a Cadenazzo (Tessin).
RR actualitad 17:00 / TR Telesguard 17:40
