La regiun da Tusaun survegn ina halla d’eveniments

La regiun da Tusaun ha nagina gronda halla per eveniments. Sin la fin da l’onn duai quest problem esser liquidà. La associaziun BündnerVIEH fabritga per dus milliuns ina nova halla dad eveniments da 45 sin 30 meters ed ina autezza da 6 meters.

Quella duai d’ina vart remplazzar las tendas da festas per ils eveniments da purs sin l’areal da la Bündner Arena e da l’autra vart porscher a la regiun ina attractiva halla dad eveniments. La halla vegn tegnida simpla e na ha betg pitgas en l’intern. Uschia duai la halla esser fitg flexibla quai che pertutga eveniments ed utilitad.

Pervia da custs be ina halla

Set onns han ins ussa planisà fin che GraubündenVIEH è vegnì tar la halla definitiva. «Sco emprim era l’idea dad era porscher ina halla a las organisaziuns dad unihockey ni ballape. Ils custs tranter set fin otg milliuns», di il president d’administraziun da GraubündenVIEH, Duri Campell. «Cur ch’i gieva per sa participar als custs, na vuleva tuttenina nagin pli esser da la partida.»

Uschia ha GraubündenVIEH decidì da far sulet ina halla. Dapli che dus milliuns na possian els betg investir. La halla duai porscher als purs ina halla attractiva, dentant era la regiun duai pudair profitar d’ina halla multifuncziunala.

«Festa da nozzas nua che vegnan uschiglio vendi vatgas.»

La definiziun da la nova halla dad eveniments a Cazas e propi fitg vasta. Uschia possia il militar duvrar la halla sco garascha per ils vehichels durant exercizis ni ils purs la halla per vender biestga. «Dentant era per festas da nozzas ed a firmas stat la halla a disposiziun», di la responsabla per halla e marketing, Gabriela Banzer.

«Sco emprim vev jau era dubis, sche quai è propi pussibel cun uschia differents eveniments. Entant sun jau dentant persvasa che quai funcziuna bain.»

Sin la fin da l’on e la halla a fin

Cun la badigliada ils 17 d’avust han las lavurs cumenzà. Il december duain las lavurs gia esser a fin. Uschia che GraubündenVIEH sa beneventar ad interessads ils 19 da december al di da las portas avertas.