La Rumantschia dovra ina gasetta quotidiana

  • Actualisà Glindesdi, 30.10.2017, 18:56

Ina retschertga che l'institut Link ha fatg per la Lia Rumantscha mussa ch'il basegn per ina gasetta dal di rumantscha è qua.

frontispizi da la Quotidiana cun il titel «È la Quotidiana a fin?» Bild in Lightbox öffnen.

Legenda da maletgs: Tenor ina retschertga per incumbensa da la Lia Rumantscha vul la Rumantschia er vinavant ina gasetta dal di. Grafica RTR

Passa 80% dals dumandads èn da l'opiniun ch'i dovra vinavant ina gasetta rumantscha quotidiana. I tanschess dentant era sche la gasetta cumparess mo duas fin trais giadas l'emna.

Plinavant sorta da la retschertga che 44% dals lecturs èn sur 60 onns. Be 16% èn sut 35 onns. Legida vegn la Quotidiana principalmain pervi dals temas locals. Er pon passa la mesadad dals lecturs s'imaginar ch'i dess en l'avegnir la gasetta be pli online. La retschertga è vegnida preschentada la sonda a la radunanza da delegads da la Lia Rumantscha.

Tge giavischs han ils delegads per la Quotidiana dal futur?

Ina gasetta online u vinavant ina gasetta stampada? Ina gasetta rumantscha en la rait saja il futur, dentant saja i vinavant impurtant da porscher ina gasetta stampada, è il tenor da las delegadas e dals delegads.

Laschar ir video «Gasetta quotidiana - in tema tar ils delegads da la Lia Rumantscha»

Gasetta quotidiana - in tema tar ils delegads da la LR

2:49 min, Telesguard dals 30.10.2017

Proxims pass

Sco proxim sa metta la gruppa Medias Rumantschas 2019 vid la lavur. Sco emprim saja da contractar cun il chantun e la confederaziun davart il plan da termins, declera Martin Gabriel, secretari general da la Lia Rumantscha e manader dal project Medias Rumantschas 2019. Plinavant vegni era tschertgà il discurs cun l’editur da la Quotidiana per guardar sche la gasetta vegniss era anc squitschada il 2019 per avair uschia dapli temp per planisar il futur.

Silsuenter èsi planisà dad ir en las differentas regiuns rumantschas per sentir il puls e per dumandar tge che vegn spetgà en il futur dad ina gasetta rumantscha.

Iniziativa «No-Billag»

Plinavant èsi vegnì decidì da sustegnair activitads cunter l'iniziativa No-Billag cun 100'000 francs. Plirs votums hajan demussà la necessitad da mobilisar la populaziun cunter l'iniziativa, scriva la Lia Rumantscha. L'iniziativa da No-Billag vul abolir las taxas da radio e televisiun.

RR novitads 14:00++