Siglir tar il cuntegn

Header

cuntegn

Ulteriur Grischun La scarsola DAVOS duai puspè turnar a chasa

Dus schlusigls, trais lattas da l'enn ed ina corda, dapli na dovri betg per la pli renumada scarsola dal mund, la scarsola DAVOS.

Ella datti en tschient variantas, dentant insatge na datti betg. Scarsolas DAVOS che vegnan era propi producidas a Tavau, quai less il scrinari Paul Ardüser midar. Il possessur da la scrinaria Ardüser SA a Tavau less puspè producir scarsolas DAVOS en ses lieu d'origin.

La fascinaziun per scarsolas

Paul Ardüser è fieu e flomma per las scarsolas, la fascinaziun ha entschavì gia d'uffant cun sia atgna scarsola DAVOS. Dentant èn las scarsolas era ina tradiziun da famiglia. La scrinaria ch'el posseda oz ha numnadamain ses tat fundà e gia lez construiva scarsolas. Cun il temp han las scarsolas fabritgadas industrialmain stgatschà las scarsolas fatgas a maun.

Cura che Paul Ardüser ha dastgà construir per Tavau turissem ina scarsola surdimensiunada ha el gì l'idea da puspè far scarsolas DAVOS a Tavau. Il giavisch da Paul Ardüser è da pudair dar vinavant sia fascinaziun per la scarsola. Uschia che la glieud schess, "Bain, jau less ina scarsola DAVOS ch'è propi vegnida producida a Tavau". Uschia chattassi la scarsola enavos a chasa.

Paul Ardüser cun ina da sias scarsolas DAVOS.
Legenda: Paul Ardüser cun ina da sias scarsolas DAVOS. RTR, A. Hendry

L'istorgia da las scarsolas DAVOS

Las pli renumadas scarsolas derivan da Tavau, ellas n'èn dentant betg vegnidas inventadas là. Scarsolas devi gia pli baud. Oriundamain vegnan ellas da la Norvegia, mastergnants da Tavau han lura sviluppà vinavant ellas, di Paula Ammann, guida dal museum da sport d'enviern a Tavau.

Ina scarsola cumplettamain da lain

La scarsola DAVOS è speziala, perquai ch'ella è dal tuttafatg da lain. Ella è spert sa derasada e daventada in hit. L'emprima cursa uffiziala da scarsola è stada l'onn 1883, da Tavau a Claustra. Questa cursa ha lura era dà il num a la scarsola, DAVOS. Realisà la cursa han giasts englais che accumpagnavan lur confamigliars ch'eran malsauns e faschevan cura a Tavau. Las cursas eran encunter la lungurella.

Ils Englais han lura era fundà il "Club da scarsolas internaziunal Tavau", presidià da John Addington, in poet e criticher da litteratura englais.Ozendi posseda bunamain mintga famiglia en las muntognas ina scarsola, ed ir a scursalar è anc adina ina buna alternativa sper ir cun skis ni cun aissa.

Scarsolas DAVOS puspè da Tavau

Per realisar il project da puspè construir scarsolas a Tavau ha Paul Ardüser entschavì cun crowdfunding. Entaifer 100 dis less el rimnar 13'000 francs per finanziar ses siemi.

"Crowfunding" per sustegnair il project

Ina scarsola DAVOS è tradiziunalmain 80 enfin 130 centimeters lunga, ed ella è da lain fraissen. Impurtant è, che la scarsola na vegn betg collada. Uschia saja la scarsola pli stabila e flexibla, declera Paul Ardüser.

El è sa decidì per crowdfunding, vul dir, ins po sustegnair ses project sin ina plattafurma a l'internet e survegn persuenter in regal per 15 francs survegn ins ina charta da Tavau, per 650 francs survegn ins ina da las emprimas 20 scarsolas che Ardüser producescha.

Artitgels legids il pli savens