Bain ha la regenza grischuna gia decidi che la HTW resta a Cuira. A Landquart na vegni dentant betg dà si uschè spert.
Tenor Sepp Föhn, president da Landquart fissan els l’alternativa ideala tar Cuira.
Landquart fiss il lieu ideal per ina nova HTW.
Ma uschè spert na vegni betg dà si, di Sepp Föhn, il president da Landquart. Fin a la fin da l’onn veglian els inoltrar in’offerta al chantun. Els hajan numnadamain il plaz per ina nova HTW cun tut las localitads ch’i duvrass.
Pauc plaschair da l’interess dals da Landquart ha il martgà da Cuira. La regenza haja gia decidì che la scola auta da tecnica ed economia resti a Cuira. Questa decisiun saja da respectar da tuts, di il president Urs Marti.
Lieus a Cuira betg adattads per nova HTW
Ils plans per in nov campus da la Scola auta da tecnica ed economia a Cuira na persvadan betg. Ni il project Pulvermühle, ni il project Neumühle hajan il potenzial per realisar in nov center da scola auta – scriva la regenza grischuna.
Tranter auter crititgescha la regenza la colliaziun cun il traffic public che na saja betg suffizienta a la Pulvermühle. Quella saja meglra tar la Neumühle. Tenor la regenza avess ina strategia da dus lieus cun Neumühle sco lieu principal e Pulvermühle sco lieu supplementar il pli grond potenzial per realisar in tal project. Sch'i duai vegnir suandà ina strategia cun be in lieu a lunga vista saja da ponderar da cumprar il lieu Kettweg e far ils scleriments necessaris per la cumpra.
Sin fundament da questa analisa na possia anc betg vegnir decidì definitivamain davart in nov lieu per ina nova HTW. Enfin il mars 2018 sto la Scola auta metter a disposiziun ulteriuras infurmaziuns davart lur basegns per ch'i possia vegnir fatg ulteriurs scleriments. Plinavant sto l'uffizi da construcziun auta sclerir co las pussaivladads per cumprar il lieu Kettweg stattan. Enfin mez avust 2018 sto il rapport vegnir preschentà a la regenza. Suenter po lura il Cussegl grond prender posiziun davart il project per la nova HTW a Cuira.
RR novitads 11:00++