Siglir tar il cuntegn

Header

cuntegn

Ulteriur Grischun Las nuschs grischunas spetgan l'indriz da California

Il pur Johannes Janggen da Malans quinta quest onn cun in'emprima racolta da circa ina tonna nuschs. Il proxim onn duai tut ir pli svelt per la producziun da las nuschs.

1'300 nuschers posseda Johannes Janggen. Quai ch'ha cumenzà il 2010 cun 50 plantas è daventà in reginavel da nuschs enturn Malans. Fertant ch'ils nuschers en la spunda sur Malans datiers dal bain puril portan gia nuschs, han ils nuschers da Johannes Janggen en la planira betg si fritgs. Quai ha da far cun quai ch'ils nuschers en la spunda èn vegnids plantads dus onns avant e portan uschia era pli baud fritgs. Il pur da Malans quinta tuttina quest onn cun in'emprima racolta da radund ina tonna.

audio
Bunura: Emprima racolta da nuschs a Malans
ord Actualitad dals 04.10.2018.
laschar ir. Durada: 1 minuta 53 Secundas.

Ma la gronda racolta vegn pir anc. Las nuschs da quest onn vegnan plitost duvradas per far tests. Il proxim onn èsi alura quintà da producir nuschs en ina pli gronda dimensiun.

In indriz da California

Il proxim onn duai arrivar in indriz da producziun da nuschs en la valita da circa 750'000 francs. Quai indriz vegn producì d'ina firma speziala en la California. Uss manchian be pli las davosas suttascripziuns per segirar la finanziaziun e schon duess la maschina americana vegnir. Johannes Janggen è persvadì che quai vegn a gartegiar e spera che la maschina possia vegnir duvrada tar la proxima racolta l'atun 2019.

Societad cooperativa cun center Malans

Quai project è vegnì inizià d'ina societad cooperativa da differents plantaders da nusch en la Svizra orientala. En il Grischun datti en il Puschlav, a Maiavilla ed era a Malans nuschers che tutgan tar la societad. L'idea è che tut las nuschs da quella possian vegnir elavuradas en l'indriz a Malans – pia il rumper, il sortir ed il pachetar la nusch. Lura duajan las nuschs vegnir vendidas a pasternarias ed in di daventar part da las turtas da nuschs grischunas.

Ils custs avain nus uss e la rendita lura speranza en tschintg enfin sis ans.
Autur: Johannes Janggen possessur dals nuschers a Malans

RR novitads 08:00

Artitgels legids il pli savens