Siglir tar il cuntegn

Header

Navigaziun

In helicopter da la Rega al lieu da disgrazia.
Legenda: En tut èn stads en acziun 5 helicopters da salvament ed in’equipa da salvamant cun in chaun da lavina. pocha gr
cuntegn

Ulteriur Grischun Lavina al Piz Vilan - 5avla persuna mora en l'ospital

Suenter la disgrazia da lavina al Piz Vilan sur Seewis è entant in'ulteriura persuna morta. La dunna saja morta la notg en consequenza da las grevas blessuras, uschia communitgescha la polizia chantunala.

Cunquai s'augmenta il dumber da las unfrendas sin 5. 2 ulteriuras persunas ch'eran vegnidas tschiffadas da la lavina èn ospitalisadas cun grevas blessuras.

Duas persunas mitschan senza blessuras

Be duas persunas èn mitschadas senza blessuras, sco quai che Anita Senti, la pledadra da la polizia chantunala ha ditg sin dumonda da RTR. Ina da las duas persunas haja pudì sa deliberar sezza ord la lavina, tschella na saja betg vegnida tschiffada. “Per las duas persunas avain nus clamà in Care Team”, uschia Senti. “Nus avain interrogà las duas persunas e sco quai ch’i para eran anc auters skiunzs da tura al lieu.”

5 helicopters da salvament

La gruppa d’en tut 9 skiunzs da tura saja stada sin via a val en direcziun Seewis cura che la lavina saja vegnida. En tut èn stads en acziun 5 helicopters da salvament ed in’equipa da salvament cun in chaun da lavina. La procura publica e la polizia chantunala examineschan la raschun per la disgrazia al Piz Vilan. Persunas che pon far indicaziuns davart la distatga da la lavina u l'accident èn supplitgadas da s'annunziar tar la polizia chantunala.

(RR novitads 18:00/09:00)