Siglir tar il cuntegn

Header

audio
Emprima fiera emnila a Cuira: La reportascha
Or da Actualitad dals 03.05.2021.
laschar ir. Durada: 04:05 minutas.
cuntegn

Legums, liongias e spargias Fiera emnila en citad veglia ha carmalà blera glieud

Suenter lung temp ha la fiera emnila a Cuira puspè gì lieu en ses plaz usità. Vitiers para Petrus d’avair gì buna luna. Quella cumbinaziun ha la sonda passada carmalà blera glieud en la citad veglia.

En las giassas stretgas da la citad veglia da Cuira han var 40 vendidras e vendiders exponì lur delicatessas. Suenter ch’ils expositurs han durant lung temp stuì guntgir sin la via da la staziun, èsi stà l’emprima fiera, ch’els han puspè pudì far al lieu usità. Per Aldo Arpagaus da Cumbel, ch’ha dapi 2010 in stan a Cuira, è quai in grond levgiament. La via da la staziun saja atgnamain in lieu pli prominent, dentant n’haja quel betg derasà l’atmosfera da fiera. En la citad veglia saja quai tut auter.

Era sche las vias da la citad veglia èn stadas bain emplenidas: l’obligatori da mascras è vegnì resguardà fitg bain. Plirs placats sin la fiera han adina puspè fatg attent la glieud sin las mesiras. Era durant star en colonna tar divers stans ha la glieud empruvà da tegnair distanza.

Spargia – verdura da hit 2021?

In dals stans ha cunzunt attratg l’attenziun, numnadamain il stan da spargias da la famiglia Gisler da Cuira. Gia in’ura suenter che la fiera era averta, sajan tut ils quatter chartuns plain spargias stads vendids, declera Hanspeter Gisler, manader da producziun. Uschia han els anc ina giada stuì ir per ina chargia.

Insumma haja el constatà, che las spargias giajan quest onn davent sco paunets frestgs. Il motiv persuenter savess esser la buna qualitad u er perquai ch’i sa tractia tar las spargias d’ina bumba da vitamins, ch’ins possia cuschinar a moda e maniera differenta.

audio
Emprima fiera emnila a Cuira: Boom da spargias e sias sfidas
02:59 min, Actualitad dals 03.05.2021.
laschar ir. Durada: 02:59 minutas.

RTR actualitad 07:00

Artitgels legids il pli savens

Scrollar a sanestra Scrollar a dretga