In di che mida tut
«Lisa prenda la storta» è in film che raquinta l'istorgia da vita da Lisa Monn davent dal di che n'ha betg mo midà sia fatscha, mabain era si'entira vita. Igl è in'istorgia ch'ha era tutgà mai sco autura sco anc nagina da mias istorgias fin uss.
Ils 20 d'avust 2016 va Lisa cun duas amias a rimnar izuns sur Tavau. La saira na turna ella dentant betg a chasa. Enstagl da turnar a chasa, vegn ella transportada cun grevas blessuras en fatscha e cun ina sperdita da dus liters sang en il ospital. Là vegn ella operada urgentamain.
Ina da las perditgas da l'accident e l'um pensiunà Ueli Furrer da Tavau. Ils 20 d'avust vul el far in viadi da dumengia cun sia dunna. Sin via a chasa succedi, Lisa charrescha cun 39 km/h en l'auto dad Ueli Furrer.
Ueli Furrer ha scrit si ils eveniments da quel di per che Lisa chapeschia, tge ch'è atgnamain schabegià. Cura ch'jau hai visità Ueli Furrer a Tavau per far mes film, ha el prelegì sias brevs.
Lisa è crudada
En ina storta nunsurvesaivla sur Tavau èsi capità. Lisa è crudada dal velo, s'ha rut plirs oss en fatscha. Mo cun blera fortuna è l'egl restà intact. Ella è vegnida transportada urgentamain da Tavau en l'ospital da Cuira, da là vinavant en l'ospital universitar da Turitg. Là ha ella stuì spetgar sin l'emprima operaziun. Per ella è quai ina da las regurdientschas las pli grevas.
Lisa è puspè s'auzada
Suenter l'accident, suenter il temp en l'ospital è vegnì il il temp da reabilitaziun. Bleras uras fisioterapia han gidà da sa revegnir corporalmain. Lungs discurs cun buns amis e famiglia han gidà da sa revegnir mentalmain. Durant quai temp ha Lisa era fatg ina scolaziun sco scolasta da joga. Ella ha emplenì plirs cudeschs da notizias cun tut ses patratgs, sias temas e regurdientschas - ed ha emprendì d'acceptar ses destin e fatg pasch.
Lisa ha cuntinuà la via
Oz, in onn e mez suenter l'accident, è Lisa enavos sin sia via. Suenter ch'ella aveva prolungà ses studi da fisioterapia, lavura ella uss sco fisioterapeuta diplomada en l'ospital chantunal a Lucerna. Ella abita era a Lucerna nua ch'ella passentà bler temp cun ses amis e sias amias sco era cun sia gronda charezza, l'ami Alex. Ella fa bler sport e bler joga. Oz sa Lisa era puspè ir cun velo, malgrà tut quai ch'ella ha fatg tras, malgrà las temas, il trauma e las regurdientschas. Sur Pasca vul Lisa perfin far ina cursa da velo sur 90 kilometers ensemen cun l'ami Alex.
Lisa ha decidì dad ir vinavant. Ella ha decidì, da far il meglier or da ses destin. Ella ha decidì, da far tut quai ch'ella vul far. E nagut tegna enavos ella da quai.
Qua l'entir film – «Lisa prenda la storta»
