Siglir tar il cuntegn

Ulteriur Grischun «Ma chan ned de Füfer und s'Weggli ha!»

Via libra per schlargiar la Via da Masans: Il cussegl communal da Cuira ha approvà il project cun 16:4 vuschs ed ina abstenziun. Quai signifitga la fin dal chasa «zur Kante».

il cussegl en plenum a sia sesida.
Legenda: Gea a la via, na a la chasa - il cussegl communal da Cuira ha decidì cun 16:4 vuschs tar in'abstenziun. RTR/gmm

Questa mesemna ha il cussegl communal da Cuira discutà davart il futur da la Via da Masans. Quai è la via che cumenza tar il teater da Cuira e va fin tar l'entrada da l'autostrada Chur Nord.

Per questa via avev’ins decidì da far ina via cun via separada per bus e per velos en trais etappas. Il 2013 aveva il cussegl communal decidì da mo realisar quest project sche questas dus vias supplementaras èn dapertut realisablas. Quai è da quella giada vegni approvà uschè.

Chasa «zur Kante» en via a la via

Il project era dispitaivel pervi ch’il schlargiament pretenda da spazzar la chasa «zur Kante» a la fin da la Via da Masans en direcziun entrada autostrada Chur Nord. Questa chasa era vegnida classifitgada cun «degna da protecziun», ma na stà betg sut protecziun.

Portrait Tom Leibundgut
Legenda: RTR/gmm
Ma chan ned de Füfer und s'Weggli ha!
Autur: Tom Leibundgutcusseglier da citad, Cuira

Discussiun en il cussegl: Quitads per il purtret da la citad vs. segirezza sin via

En la discussiun è vegnì clar ch’in traffic segir sin la Via da Masans ha prioritad. Per bler è quel dentant mo segirà cun dus vias supplementaras senza interrupziuns. Tuttina ha Guido Decurtins era intunà l’impurtanza da questa chasa istorica. I fiss putgà sch'ins remplazzass lura la chasa intgins meters pli enavos cun ina chasa moderna. Qua giaja a perder bler dal purtret da la citad. Quai capitia pel mument dapertut.

Adrian J. Mejer ha dentant mess en dumonda quest punct. El dumonda nua che la glieud che cumbatta ussa per la chasa «zur Kante» saja stada ils davos onns. La chasa stettia numnadamain gia blers onns vita e nagina haja mussà interess da midar quai.

«Ins na po betg avair il tschincun ed il paunin»

La fin finala ha il cusseglier da citad Tom Leibundgut resumà ch’ins na possia avair omadus. U ch'ins vul ina via segira u ina chasa istorica per il maletg da la citad. «Ma chan ned de Füfer unds Weggli ha!», ha Tom Leibundgut detg tar la discussiun.

Il cussegl communal da Cuira s'ha ussa pia decidì per la via segira. Uschia vegn ins a realisar il project d'in milliun francs per schlargiar la Via da Masans.

Il cussegl communal era dentant dal avis che mo cun quest schlargiament san ins garantir en futur la segirtad dal traffic cun ina via per bus ed ina per velos sin la via da Masans.

RR novitads 16:00