Fläsch, Jenins e Maiavilla èn enconuschents per las grondas vignas. Per la racolta han ins dapi decennis adina dà liber als uffants. Uschia pudevan quels era gidar enstagl dad ir a scola. Quella tradiziun è uss dentant a fin.
La vendemia na san ins betg planisar
I saja adina stà grev da fixar l'emna, declera Christoph Kuoni dal cussegl da scola da Maiavilla. L'emna da vacanzas stoppian els fixar ditg oravant. I saja dentant adina stà grev da chattar ora, cura che la vendemia haja lura propi lieu. I saja gia capità che las vacanzas eran lura, cura che las ivas n'eran anc betg madiras. Ultra da quai dettia bleras famiglias che n'hajan gnanc pli vignas.
Trair vinavanat l'usit en autra furma
Las scolas èn ussa vegnidas a la conclusiun da desister da l'emna e persuenter introducir dus dis flexibels. Cun quels pon ils uffants ir a gidar cura che la vendemia ha effectivamain lieu. Ils scolars e las scolaras han lura da dumandar per la lubientscha. Uschia possian ins trair vinavant la tradiziun.
RR actualitad 07:00