Suenter bunamain 2 mais da lockdown han scolas, ustarias, centers da fitness ed era stizuns puspè pudì avrir lur portas. Ina da las grondas stizuns a Cuira, il Manor, ha durant il temp da lockdown be pudì avair avert la partiziun da mangiativas. Uss han els puspè pudì avrir tut las partiziuns da la stizun.
I n'ha betg dà gronds problems en il negozi. La glieud è vegnida, quai è bel. Il negozi n'era l'entir di betg surchargià. I n'ha betg dà grond stress. Quai è stà in bel mument ed in levgiament.
Cunzunt per il directur dal Manor a Cuira è la reavertura stada fitg speziala. Sia nova plazza sco directur ha el pir cumenzà l'entschatta mars, pia curt avant che la stizun aveva stuì serrar.