Siglir tar il cuntegn

Header

audio
Bunura: Las sfidas dals autists e co ir enturn cun quellas
Or da Actualitad dals 22.01.2020.
laschar ir. Durada: 03:17 minutas.
cuntegn

Manuela Tscholl «Mintg'autist è medem – e medem different»

Manuela Tscholl maina dapi 5 onns la gruppa d'agid a sasez per persunas cun sindrom d'Asperger. Ina giada il mais discutta ella cun enturn 5 persunas davart las sfidas il mintgadi – e davart las soluziuns.

Ils inscunters da la gruppa d'agid a sasez èn adina l'emprim glindesdi dal mais. Enturn ina maisa en in local amez Cuira vegnan ensemen persunas da differentas vegliadetgnas e da tut ils mansters. Cun ina scadiola tee u café discurran els davart las sfidas dals autists e las autistas.

Ils temas principals èn atgnamain il mintgadi e co ir enturn cun sentiments.
Autur: Manuela TschollTgirunza spezialisada sin problems psichics

Fitg bler discuttan els davart collegs e collegas da lavur, che na chapeschan betg la situaziun d'ina persuna cun autissem. Surtut sch'in collega n'enconuscha ils basegns dad uschia ina persuna sai vegnir difficil.

En las sesidas, che cuzzan var duas uras, raquintan ils autists avertamain situaziuns concretas – per part fitg detaglià. Pel solit ha intgin schon fatg las medemas experientschas, uschia ch'ins sà tschertgar discussiunant ina soluziun. Qua u là datti er auters exercizis. Uschia hajan els empruvà da definir co ch'els percorschan ch'intgin è cuntent, trist u grit. Quai duess gidar da chapir meglier il visavi.

Discussiuns fitg avertas

Er sche persunas cun sindrom d'Asperger han difficultads da chapir ils sentiments d'in visavi: las discussiuns sajan adina fitg avertas.

Sch'ins è tranter persunas ch'han da viver cun sumegliantas sfidas, lura discurran ins er pli avert sur d'ina sfida – simplamain pertge ch'ins sà: Quels chapeschan mai.
Autur: Manuela Tscholl

E bain ch'ils participants han sumegliants problems e la medema diagnosa: Sut il stritg sajan els anc adina fitg differents. Sco definiziun per ina persuna cun autissem di Manuela Tscholl perquai er: «Mintg'autist è medem – e medem different»

Ed er sch'ina gruppa d'agi da sasez na tuna betg propi suenter plaschair: Manuela Tscholl sa legra atgnamain adina sin quellas sesidas. «A la fin datti adina bunas discussiuns».

RTR actualitad 07:00