Il recurrent aveva crititgà che la parcella na saja betg accessibla bain avunda. Avant ch'i na dettia nagina via da peduns e da velo en il quartier, na dastgia er betg vegnir bajegià in center d'asil, aveva il recurrent pretendì.
Tribunal federal dat glisch verda
Ils derschaders a Losanna refusan il recurs. Uschia dastga il chantun Grischun bajegiar il center d'asil a Meiersboden. Meiersboden vala bain sco quartier a l'ur da Cuira, sa chatta dentant sin il terren da la vischnanca da Churwalden. Il center d'asil duai custar en total passa 8 milliuns francs e porscher plaz per 180 requirents d'asil.
I dovra in tschert temp
Oriundamain eri planisà ch'il center avria sias portas il matg 2017. Cura ch'il chantun cumenza cun las lavurs da construcziun e fin cura ch'il center è semtgà, n'è anc betg enconuschent. Tenor Markus Dünner, l'architect chantunal saja uss ina giada da spetgar giu las vacanzas da la mastergnanza. Silsuenter vegnian ins a decider sche las lavurs pon gia cumenzar quest onn u pir l'onn proxim.
Cunquai ch'il project è gia sistì dapi passa dus onns dovria quai in tschert temp per lantschar da nov tut, cunquai ch'er planisaders e las fatschentas da construcziun èn fatschentadas cun auters projects.
RR novitads 12:00