Siglir tar il cuntegn

Ulteriur Grischun Mida il mund - intimescha il Teater da Cuira

Il Teater da Cuira ha preschentà ses program da la stagiun 2018/19. In dals puncts culminants è il festival «BRECHT/BB18». Il motto è «Mida il mund».

Da sanester: Nikolaus Schmid, Samuel Schwarz, Ute Haferburg e Martina Mutzner.
Legenda: Da sanester: Nikolaus Schmid, Samuel Schwarz, Ute Haferburg e Martina Mutzner. RTR, Angela Hendry

Il Teater da Cuira saja schon adina stà revoluziunari, di la directura Ute Haferburg. Avant 70 onns è Bertolt Brecht turnà da ses exil en l’America enavos en l’Europa, e sco pli emprim ès el stà a Cuira per mussar ses pli nov toc da teater «Antigone des Sophokles». In toc che sa fatschenta cun la guerra mundiala, il faschissem, il holocaust ed era la bumba atomara.

Brecht saja anc oz actual, di la directura Ute Haferburg. En il temp da Donald Trump e fake news dapertut saja quai impurtant dad emprender, tge ch’è realitad e tge illusiun.

Midar il mund cun reflectar la societad

«Brecht!/BB18» mussa tranter auter la versiun classica da «Die Antigone des Sophokles», cun temas actuals sco in mund pli e pli global, nov naziunalissem, schanzas e privels da roboters, d’intelligenza artifiziala e da la realitad virtuala.

Cun reflectar la societad, las relaziuns tranter las persunas, cun transfurmar la realitad en insatge spezial, cun porscher teater da different gener vegnia il Teater da Cuira forsa a midar ils carstgauns, ed uschia era da midar il mund, di Haferburg.

RR actualitad 07:00