Siglir tar il cuntegn

Header

cuntegn

Ulteriur Grischun Mo 1 vul far president a Domat

Cunquai che Beatrice Baselgia (PS) ha demissiunà èsi cler che Domat survegn in nov timun. Enfin ussa è enconuschent be in candidat, numnadamain Erich Kohler (PCD). Erich Kohler ha 54 onns, è actualmain en il parlament da Domat, fa part da la cumissiun da gestiun ed è substitut dal Cussegl grond.

Cun Erich Kohler fiss quai l'emprima giada dapi 16 onns che la PCD avess in president a Domat, malgrà ch'ella è cleramain la pli ferma partida locala.

audio
Mezdi: Tgi candidescha per presidi e suprastanza a Domat?
ord Actualitad dals 31.03.2016.
laschar ir. Durada: 4 minutas 11 Secundas.

Anc betg decidì sch'ellas van en la cursa per il presidi da Domat han la partida liberaldemocratica (PLD) e la partida burgaisdemocratica (PBD).

Cumbat per in sez en la suprastanza

Per ils 4 sezs sco suprastants datti actualmain 5 candidats: Gabriela Aschwanden ed Armin Tanner (omadus PCD) vulan restar en uffizi. Ils socialdemocrats desistan d'ina candidatura per il presidi, han dentant nominà Silvia Bisculm Jörg per la suprastanza. La PPS vul conquistar per l'emprima giada in sez en la suprastanza da Domat ed ha nominà Daniel Meyer.

PLD e PBD pondereschan anc

Ils liberaldemocrats ston remplazzar Angela Casanova ch'è sa retratga da la suprastanza. Actualmain fan dus nums la curella a Domat: Jürg Rodigari e Daniel Kunfermann Maissen. La partida decida mez avrigl tgi trametter en la cursa. Retschertgas dad RTR mussan, che la PLD pudess desister d'in candidat per il presidi - sche la PCD sustegness persuenter il candidat liberal per la suprastanza.

Tar la PBD avessan blers pensà ch'ella giaja pir en il cumbat per il parlament da Domat (l'elecziun è il november). Ils burgaisdemocrats pondereschian actualmain anc e decidian en bun in'emna, sch'els veglian forsa tuttina candidar gia per ils 5 da zercladur per la suprastanza - hai gì num sin dumonda dad RTR.

Artitgels legids il pli savens