Siglir tar il cuntegn

Header

audio
Slotracing a Cuira: cursas cun autos pitschens sco «Carrera»
Or da Actualitad dals 19.08.2021.
laschar ir. Durada: 4 minutas 50 Secundas.
cuntegn

MRC Cuira Cursas dad autos – simplamein in zic pli pitschen

A Cuira vegn organisà regularmain cursas dad autos. Quels autos èn dentant in zic pli pitschens che normal, bler pli pitschens.

En il Welschdörfli, gist sper la pendiculara da Brambrüesch, en il tschaler dad in grond bajetg dad industria, ha il MRC Cuira sia sedia. Il club organisescha regularmain cursas cun autos da model, autos pitschens, sumegliant a Carrera – dentant tut in zic pli professiunal, e quai sin in cirquit da cursa da radund 37 meters lunghezza.

Tge è slotracing?

Avrir la box Serrar la box

Tar il slotracing vegnan ils autos tegnids entras in slot en la lingia da cursa. Ils autos vegnan alura motorisads entras electricitad. Il princip è sumegliant a quel da Carrera. Il cirquit da cursa n'è dentant betg or da plastic, mabain surtut or da lain. Plinavant funcziuna l'entir sistem analog. Vul dir: mintga lingia dad autos ed uschia er mintga auto ha in'atgna lingia da current. Uschia pon plirs autos ir in sper l'auter ed ins po realisar cursas cun fin a tschintg vehichels.

La fascinaziun dad ir e laschar ir autos

Igl è in zic sco in siemi dad in buob ch'è ì en vigur, di Andy Reich, in dals fundaturs dal MRC Cuira. El saja gia da pitschen stà in fanaticher dad autos – il siemi dad ina giada posseder in cirquit da cursa saja adina stà existent.

Sche Dieu avess vuliu, fiss jau possesur dad in cirquit da cursa, uss èsi simplamain tut pli pitschen.
Autur: Andy Reich Confundatur dal MRC Cuira

Cumenzà ha dentant tut a Spielberg durant ina cursa da furmla 1 – là èn el ed in collega vegnids sin l'idea da fundar in club. Ensemen cun ses figl, amis ed auters interessents dal slotracing è questa idea alura vegnida realisada be paucas emnas pli tard. Quai è stà avant in zic dapli ch'in onn. Dapi lura è vegnì fatg bler. Davent da la cumpra dad in cirquit, ch'ins ha stuì bittar davent perquai ch'el n'adempleva betg las speranzas – fin a la renovaziun dal tschaler nua ch'il club sa chatta uss.

Il cirquit da carrera
Legenda: Andy Reich, in dals fundaturs dal club, plazzescha bufatg in auto sin il traject da cursa. RTR / Samuel Sossai

Lavur vi dals autos è lavur da detagl

Per far cursas na dovri dentant betg mo in cirquit da cursa, mabain era ils autos. Ils autos èn insatge tut spezial ed en il club posseda mintgin ses agen. Ils pitschens vehichels èn colurads, designads e mess ensemen tenor las atgnas preferientschas. Igl è lavur da detagl, lavur che dovra temp e lavur che va mintgatant en las chautschas. «L'emprim auto na vegn segir betg ad esser in bel auto», uschia Andy Reich.

Porsche rosa
Legenda: Il Porsche da la suletta giuvna en il club da slotracing. MAD, Gianna Turra

Mo attenziun: tut n'è betg lubì – i dat cleras prescripziuns co l'auto dastga esser, con grev, tge material che vegn duvrà. Quai è impurtant per che las cursas tranter ils manischunz restan fairas. «Sche nus tuts avessan in'auter auto, na pudessan nus betg realisar cursas», uschia Reich.

Finamira è numnadamain dad organisar zacu cursas cun auters clubs en autras regiuns – e forsa schizunt ina giada realisar campiunadis svizzers. L'impurtant resta dentant la cumpagnia, il far, il lavurar ed esser ensemen cun buns amis ed amias.

Jau ditg adina, il carstgaun sto far insatge, il carstgaun na po betg mo star airi.
Autur: Andy Reich Cofundatur dal MRC Cuira

RTR actualitad 08:00

Artitgels legids il pli savens