Siglir tar il cuntegn
Inhalt

Ulteriur Grischun Museum da la natira less far palpabel in element abstract

L'exposiziun davart l'element chemic nitrogen è in dals accents tematics da quest onn en il Museum da la natira dal Grischun.

Legende: Video Il Museum da la natira dal Grischun preschenta ses program da l’onn abspielen. Laufzeit 01:56 Minuten.
Or da Telesguard dals 08.01.2018.

L'onn 2018 stat tranter auter il nitrogen en il focus dal Museum da la natira dal Grischun. Davent da l'avrigl enfin l'avust 2018 pon interessads visitar l'exposiziun da l'element chemic nitrogen che nus respirain di per di ma ch'è tuttina fitg nunenconuschent. Per Flurin Camenisch, pedagog dal Museum da la natira dal Grischun, èsi ina sfida dad entusiasmar la glieud en il museum tar in'exposiziun davart ina chaussa abstracta. Cun in'exposiziun interactiva spera el dentant tuttina da carmalar massa visitaders en il museum.

Sper il nitrogen stattan il 2018 anc il guaud en il focus. Davent dal settember pon interessats visitar l'exposiziun «Fascinà dal guaud» che tematisescha per exempel il guaud sco spazi da viver u er il guaud sco funtauna da materias primas.

Bella cifra da visitaders

Sco il directur Ueli Rehsteiner ha ditg davant las medias haja il museum cuntanschì il 2017 ina bella cifra da visitaders: Passa 35'000 persunas han visità las diversas purschidas. Quai sajan dapli visitaders ch'ils davos otg onns. D'in record discurra Rehsteiner dentant betg. El n'haja numnadamain betg la survista da tut ils onns dapi ch'il museum exista. Tuttina saja il dumber da passa 35'000 visitaders in success.

RR actualitad 17:00