Siglir tar il cuntegn

Header

Cun 12:9 ha il parlament da Cuira dit da NA ad in dretg da vuschar per esters.
Legenda: Cun 12:9 ha il parlament da Cuira dit da NA ad in dretg da vuschar per esters. RTR, Fabia Caduff
cuntegn

Ulteriur Grischun Nagin dretg da vuschar per esters a Cuira

Cun 12 encunter 9 vuschs ha il parlament da Cuira ditg NA a la proposta da la fracziun da la Partida socialdemocratica da dar a persunas estras che vivan a Cuira il dretg da vuschar tar elecziuns e votaziuns sin basa da la citad da Cuira.

La cundiziun per esters fiss stada ch'els vivan dapli 10 onns en Svizra e da quels almain 3 onns a Cuira. En il Grischun datti 18 vischnancas ch'han in tal dretg da vuschar per persunas da l’ester. Per exempel Sumvitg ed Arosa.

La Partida socialdemocratica è trumpada dal resultat, dentant han els fatg quint ch'i na dettia nagin resultat positiv. Ins studegia d'ir a ramassar vuschs tar ils da Cuira per pudair realisar in'iniziativa per ch'ils esters pon tuttina ir a vuschar.

En la citad da Cuira vivan 30’000 persunas cun in pass svizzer e 7'500 persunas estras. Da quellas han 3'877 persunas ina permissiun da domicil a Cuira.

NA al Sennhof

La citad da Cuira na cumpra betg l'areal dal Sennhof a Cuira. Cun 15 encunter 6 vuschs ha il parlament da Cuira ditg na. La Partida burgais-democratica vuleva che la citad haja dapli influenza en la citad veglia cun cumprar l’areal. Cun il NA dal parlament a quella proposta è l'areal dal Sennhof vinavant en ils mauns dal chantun Grischun.