Durant la saira da salamuiras a Panaduz fan las gruppas ina tura e visitan 6 differentas ustarias ina suenter l’autra. Quella saira ch’i dat dapi 5 onns è adina il venderdi avant la gievgia grassa.
Tenor Livio Camenisch haja quella saira mintgamai in grond resun. Dentant ston ils radund 600 aspectaturs quest onn per l’emprima giada sa divertir senza ina salamuira indigena.
Tschertgà il discurs – ma senza success
Il comité d’organisaziun da 3 umens haja schont fatg stentas per chattar in successur. Els hajan fatg in artitgel en la gasetta ed era tschertgà il discurs cun persunas che vegnan en dumonda. Tut però senza success. Ils da Panaduz n’eran betg da persvader.
Nagut «total local»
Cunquai che nagina gruppa da Panaduz prenda part, na datti era betg istorgias «total localas». E quai vegnia a mancar, di Livio Camenisch. Dentant tematiseschian era tschellas 6 gruppas da Razén e Cuira temas da la regiun, chantunals e globals.
E uschè ditg ch la glieud less tadlar salamuiras, uschè ditg ch'els hajan locals a disposiziun ed uschè ditg che gruppas fetschian part, vegnia quella saira a Panaduz vinavant organisada, agiunta Livio Camenisch, cun u senza salamuira indigena.
RTR actualitad 11:00