L’idea è en sasez simpla. Yvonne Gienal ha dumandà a mintgamai ina persuna da mintga regiun idiomatica per ina fotografia dad els da la naiv.
- Selina Gasparin, biatleta, puter
- Theo Haas, vischnanca burgaisa Domat, sutsilvan
- Benedetto Vigne, schurnalist ed autur, surmiran
- Gianna Olinda Cadonau, autura e promotura da la cultura, vallader
- Martin Candinas, politicher, sursilvan
Tiers quai ha ella anc agiuntà in'atgna fotografia per il rumantsch grischun. L’artista ha numnadamain avant insaquants onns emprendì rumantsch grischun. Ussa dat ella curs, scriva e fa l’administraziun per rumantsch grischun. Ella sa sentia uschia fitg famigliara cun la lingua.
Nagina art cun messadi politic
Er sche l’entira discussiun cun idioms ed il Rumantsch Grischun saja per mument in tema fitg actual, na veglia ella betg politisar cun l’object cun il num «NAIV È NAIV EI NEIV ES NEIV». I giaja plitost per mussar si la diversitad, ma er la cuminanza da tuts sis.
Art vegn ingiantà per La Quotidiana
Tut en tut ha Yvonne Gienal fatg sis exemplars. Quels vul ella ussa ingiantar. Il pretsch da partenza è 80 francs. Il gudogn che resulta or da l'ingiant, vul ella dar a La Quotidiana – sco act simbolic. Perquai che La Quotidiana fetschia tenor l’artista er ina lavur per la cuminanza rumantscha. Pia la tematica da l’ovra d’art exponida.
RR actualitad 08:00