Per quai pledeschian ils rapports da l'armada ucranaisa ed era quels dals observaturs internaziunals sco l’OScE. Uschia sajan las unitads militaras russas londervi da rotar lur forzas, i vegnia purtà nova tecnica militara sco chars armads da la Russia en l'Ucraina e la tecnica duvrada vegnia reparada. Tut quai mussia che las forzas dals separatists sustegnids da la Russia sajan vi da sa preparar per ina nova campagna.
Per Yuri Andruchowytsch sa tschenta la dumonda, sch’il cumbat valia insumma la paina per l'Ucraina. Quels che sajan numnadamain anc restads en la regiun da guerra sajan ubain senza iniziativa da sa defender ubain sa sentian bain cun la bloccada russa.
Referendum
I saja damai be pli ina dumonda dal temp, cura ch'i dettia in referendum, damai ina votaziun davart la separaziun da la regiun da cumbat da l'Ucraina ed ina annexiun da la Russia. Medemamain sco tar la peninsla Crim.
Sco activist sin la plazza dal Maidan
Yuri Andruchowytsch vala sco in dals pli enconuschents intellectuals da l'Ucraina e sco in dals pli profunds enconuschiders da la situaziun en ses pajais. L'um da 55 onns è però era sez activist. Tar tuttas 2 revoluziuns, la revoluziun oranscha dal 2004 sco era tar l'uschenumnà Euromaidan l'enviern 2013/14, è el stà amez en.
L'atmosfera surtut tar l’Euromaidan haja impressiunà el. I saja stada ina atmosfera inquietanta, ina maschaida da odi e amur e blers che sajan stads pronts da ristgar lur vita per salvar auters. Mai avess el cret che uschè insatge fiss pussaivel.