Siglir tar il cuntegn
Inhalt

Ulteriur Grischun Nov kino a Cuira: Teoreticamain dastgass vegnir bajegià

Il Tribunal federal ha renvià ina dumonda da las sis persunas ch'han tratg vinavant la decisiun da la dretgira administrativa chantunala. Cun la dumonda avessan las lavurs duì vegnir spustadas enfin ch'il Tribunal federal avess decidì en chaussa.

Visualisaziun dal complex da kino a Cuira Vest.
Legenda: Visualisaziun dal cumplex da kino a Cuira. MAD

La primavaira passada ha la dretgira administrativa dal chantun Grischun renvià il recurs da set vischins cunter il project dal cumplex da kino a Cuira Vest. Be pli sis persunas han lura fatg recurs cunter la sentenzia tar il Tribunal federal.

Dasper quest recurs han els plinavant tschentà la dumonda per spustar las lavurs da bajegiar, fin che la dretgira ha decidì en chaussa. Questa dumonda è dentant vegnida renviada dal president da la dretgira. Quai cun l'argumentaziun ch' ils recurrents n'hajan betg fatg valair, ch'els avessian dischavantatgs considerabels tras l'entschatta da las lavurs.

Sentenzia finala n'è anc betg sin maisa

Teoreticamain dastgassan las lavurs pia entschaiver. La sentenzia finala pertutgant il recurs n'è dentant anc betg sin maisa. Uschia ristgassan ins da puspè stuair stgarpar giu u midar il construct.

Sch'i vegn uss effectiv entschet a bajegiar u betg n'è anc betg cler: La Domenig Immobilien SA na saja anc betg sa fatschentada cun ils proxims pass, sco quai ch'ella ha declerà envers RTR.

RR novitads 14:00