Las vischnancas vesan il project da construcziun sco grond plus. Cunquai che la nova punt è ina via da la Confederaziun na ston las vischnancas betg pajar ella. Ella vegn a custar radund 34 milliuns francs. «Nus survegnin ina punt che tegn quint al traffic grond da mintgadi», di il president communal da Trimmis Roman Hug. Vuschs negativas dettia tenor el mo paucas. Quels paucs sajan surtut quels ch'han quintà da dapli canera e colonnas dad autos durant il temp da construcziun.
- Punt dubel uschè lada sco la punt veglia
- Prolungaziun da l'entrada sin l'autostrada en direcziun Turitg
- Vias da velo da mintga vart da la punt
- In trottuar sin la punt
- Ina nova rundella sin la vart da Zizers
- Rampa sin l'Industriestrasse cun dus vials
Vaz Sut sco grond profitader
Cunquai che la colliaziun traversala è la suletta pussaivladad dad ir a Vaz Sut sa mussa il president communal da Vaz Sut Hans Krättli fitg cuntens: «Igl è in grond meglierament da nossa via d'access». Schebain che la vischnanca è fitg dependenta da la punt, han tschellas vischnancas gì dapli lavur administrativa. Il terren nua che la punt vegn bajegiada tutga numnadamain a Zizers e Trimmis.
Punt actuala na basta betg pli
L'uffizi federal da vias (ASTRA) bajegia dapi il schaner 2019 vid ina nova colliaziun tranter Zezras e Vaz Sut. La punt actuala era vegnida bajegiada en ils onns 70. Ella na cuntanscha betg pli il nivel da segirtad d'ozendi. Plinavant n'è cun l'augment da traffic betg pli dà la capacitad da chargia da la punt.
RR Actualitad 11:00