Siglir tar il cuntegn

Ulteriur Grischun Open Air Kino a Cuira patescha da l'aura

Il congual cun l'onn passà vegn a mussar che pli paucs han visità l'Open Air Kino a Cuira quest onn. Quai conferma Rita Kalberer, la manadra dal Kino Cuira. Dad ina vart saja l'aura stada pli nauscha, da l'autra vart haja era il Public Viewing da l'Euro en Frantscha gì in'influenza.

La Via da Teater, davant il container cun in placat dad Ursin, davos autos sin il parcadi sper via.
Legenda: Il lieu da l'Open Air Kino n'è betg fitg atmosferic - durant il di èsi ina via transitorica cun parcadis davos il Teater da Cuira. RTR, Riccarda Müller

Cifras n'ha Rita Kalberer anc naginas da mussar. Ma i saja era senza cifras cler, che questas sajan pli nauschas che l'onn passà, nua ch'i n'aveva dà nagina concurrenza directa tras in Public Viewing, e nua ch'era l'aura era stada stabila, chauda e sitga.

Lieu pauc atmosferic

Da discutar dat surtut il lieu da l'Open Air Kino. Quel è situà en la Via da Teater tranter la part davos dal teater da Cuira e l'edifizi, nua ch'il Kinocenter è en. Congualà cun il parc da la citad, nua ch'il Open Air Kino ha gì lieu blers onns, èsi in lieu pauc atmosferic. Quai conceda er Rita Kalberer che maina il Kino Cuira ed organisescha l'Open Air Kino.

La Via da Teater cun l'indriz per tender sur via vi la taila gronda.
Legenda: La taila gronda vegn tendida sur via vi mo durant las sairas nua che l'Open Air Kino è en funcziun. RTR, Riccarda Müller

I saja dentant era in return tar las ragischs. Avant bun 30 onns haja numnadamain cumenzà l'istorgia dal kino dador en quest lieu. Sch'el resta uss là n'è betg cler. En l'avegnir possia capitar bler, manegia Rita Kalberer.

Era la grondezza è sa midada. En il parc da la citad avevan plaz 800 aspectaturas ed aspectaturs, en la Via da Teater mo 250. Per l'organisaziun ed era la finanziaziun saja quai dentant ideal.

Ultima ediziun dal 2011

L'onn 2011 ha l'Open Air Kino gì lieu per l'ultima giada en il parc da la citad. Suenter na saja quai betg pli stà pussaivel da chattar in sponsur, di Rita Kalberer. Perquai hai dà ina pausa enfin l'onn 2015.

Durant l'Open Air Kino 2016 ch'ha cumenzà ils 23 da zercladur e che dura anc enfin ils 13 d'avust, vegnan mussads 23 films. Il spectrum maina davent da classichers sco «Dirty Dancing» enfin tar pre-premieras sco la 5avla part dad «Ice Age».

RR actualitad 06:00