30 persunas han il medi Cristian Camartin ed il team da l'ospizi accumpagnà en quest emprim onn a la mort. L'ospizi a Maiavilla collavura stretg cun la partiziun da la tgira palliativa da l'ospital chantunal.
Igl è ina impurtanta purschida che nus avain dapi in onn en il Grischun. L'ospizi è cunzunt per giuvens pazients ina fitg buna pussaivladad. Avant na deva quai savens nagina soluziun adattada per questas persunas.
L'ospizi ha plaz per quatter persunas. Duas abitaziuns stattan a disposiziun. En media vivan ils cussadents tranter duas e trais emnas en lur davos dachasa. Era ils confamigliars vegnan accumpagnads dal team da tgira.
Uschia è la sora d'in cussadent, Andrea Tokalakis-Peng, cuntenta, che ses frar schumellin vegnia tgirà il meglier pussaivel a Maiavilla.
L'ospizi è fitg custaivel per mai e per mia famiglia. Nus savain che mes frar è en buns mauns e nus savain ch'insatgi è di e notg qua per el.
L'ospizi a Maiavilla è in project da pilot. Per trais onns datti dal chantun ina garanzia da deficit da 400'000 francs ad onn. Quella dovria l'ospizi tenor il manader, Urs Hardegger, quest onn. El quinta per l'emprim onn cun in deficit da 430'000 francs. Il grond problem saja ch'ils ospizis en Svizra vegnian finanziads da donnaziuns.
Quest onn è l'ospizi stà occupà per 70%, quai saja tenor il manader sur la media Svizra.
RTR Telesguard 17:40